الدولة العثمانية الجزء الثالث
الدولة
العثمانية
الجزء الثالث
لسه مع تاريخ الدولة
العثمانية.. وملحوظة عابرة نكتبها في بوست اعتراضي.. للناس المنبهرة
بـ"أرطغرل" لسبب مش مفهوم.. وواخدين تاريخه من "مسلسل"..
باعتباره حقيقة تاريخية.
التتار زحفوا علي معظم الدول في العالم القديم.. وأخضعوها..
وكان ملوك الدول دي إما بتتقتل بشكل مهين.. أو بتستسلم وتركع وتقدم فروض الطاعة
والولاء.. وتقدم نساءها تحية للتتار.. فيسيبوهم بشرط دفع الجزية.
التتار أسقطوا كوريا والصين والعراق وإيران والشام وإلخ.. معظم
آسيا وروسيا وأوروبا الشرقية.. ماعدا خمس أماكن فقط في العالم.
الخمس أماكن دي هي (1) الجزر اللي نعرفها النهاردة باسم نيبون..
أو اليابان.. وسكان الجزر دي من الأزل شعب مقاتل شديد الشراسة ذو عقيدة خاصة في
الدفاع عن وطنه. وحاكم اليابان وقتها "ووجو توكيمون" رفض يستقبل رسل
المغول أصلًا.. ولما حاول المغول يغزو البلاد عنوة.. كان مجهز لهم جيش جرار من
مقاتلين يعدوا من أمهر وأشرس المقاتلين في التاريخ.. وأبرعهم في استعمال السيف.
مقاتلي الساموراي.
رجل الساموراي بالمناسبة لما كان بيتهزم كان بيبقر بطنه بسيفه.
مقاتل اليابان إما منتصر أو ميت. في واقعة مسجلة لدى الصينيين.. في الحرب
اليابانية الصينية.. في قائد صيني اتأسر مع رجاله.. فقال للضابط الياباني في رجاء:
"أعتن برجالي.. فإنهم جنود شجعان".
فالضابط رد عليه في جدية:
"هؤلاء لم يعودوا رجالًا.. أنهم مجرد أسرى"...!
يعني لو اتأسرت بتعتبر في عقيدتهم مش راجل أصلا.. مين حيحتل
بلاد بيحميها مقاتلين زي دول بقتال مباشر؟ بالتالي التتار معرفوش يدخلوا حدود
اليابان.. ولقوا إن الحرب هناك حتستنزفهم.. فانصرفوا عنها وواصلوا طريقهم.
وثاني المناطق اللي فلتت من المغول كانت (2) أوروبا الغربية..
ودي نجت ببركة دعاء الوالدين مش أكتر.. لأن المغول دخلوا بولندا ووصلوا لحدود
النمسا.. وقبل اقتحامها بأيام.. وصل للجيش المغولي نبأ موت الإمبراطور بتاعهم
"أوقطاي خان" في 11 ديسمبر 1241.
وكان القانون المغولي الصارم بينص على أن في اللحظة دي يجب على
قادة الجيوش كلها.. الاجتماع بالإمبراطورية فورًا لاختيار وبيعة الخان الجديد.
وكان الخان الجديد دا لحسن حظ أوروبا.. له نظرة أخرى.. ومأبداش
نحو أوروبا أدنى اهتمام.. وقرر الزحف على الصين. و (3) الصين كانت وعرة متشعبة
للغاية.. وأنهكت قوات الاستطلاع المغولية بخدع وحروب عصابات كتير.. فقرروا ارجاء
غزوها للاحقًا.
و(4) الهند.. تحت قيادة "غياث الدين بلبن".. تاسع
سلاطين مماليك الهند.. اللي المغول هزموا فرسانه ومشاته بالفعل.. فدفع لهم بسلاح
جديد.. ماتعاملش معاه قادة المغول من قبل.. وماعرفوش يشوفوا له اي حل.
سلاح الأفيال.
"غياث الدين" استعان بآلاف الأفيال.. اللي درّعها بألواح
وأساور معدنية.. وركب فوق أنيابها جرابات حديدية مدعمة بنصال فولاذية.. فبقت
بدروعها القوية وأنيابها الرهيبة.. أشبه بدبابات حية.. الضربة منها بتفتك بعشرات
الفرسان في وقت واحد.. بالإضافة إلي الرماة أو قاذفي الرماح اللي كانوا فوق ظهورها.
كابوس حي مابيقفش قدام ارض وعرة ولا مياه ولا غيره.. زي الصورة
اللي مع البوست دي تقريبًا.
المغول معرفوش يشتبكوا مع "غياث الدين" في مواجهة
مباشرة تاني خلاص بسبب سلاح الأفيال دا.. صوت الأفيال أصلًا كان بيفزع خيول المغول
اللي معتادتش عليه ولا ألفته.. وكان بيفكك تشكيلات الفرسان المغولية.
و(5) أخيرا.. مصر. ومصر كانت فيها مواجهة مباشرة ومشاة لمشاة
وفرسان لفرسان.
والمرة دي.. كانت الهزيمة الساحقة للتتار.. ومش بس هزمتهم.. لأ
دي انطلقت وراهم بالعكس.. لحد منتصف آسيا.. وأبادت الجيش التتري والجيش الأناضولي
معًا في معركة "الأبلستين".. ومفضلش منه إلا "القبيلة
الذهبية".. اللي أميرها اعتنق الإسلام وسمى نفسه "بركة خان" عشان يعصم
نفسه ورجاله من المصريين.. حنتكلم عن القصة دي بالتفصيل في السلسلة دي بإذن الله.
نرجع بقى ورا بقى حاجة بسيطة.. "عين جالوت" في مصر
بقيادة "سيف الدين قطز".. كانت في الثالث من سبتمبر سنة 1260 ميلادية.
"أرطغرل غازي" كان ساعتها ملك وحاكم وقائد في الأناضول.
ومات بعد موقعة "عين جالوت" بربع قرن تقريبًا.. سنة 1281 ميلادية.
كان فين "أرطغرل" الغازي الشرس البطل الرهيب
و"عثمان الأول" وباقي أبطال المسلسل الشجعان.. لما المغول زحفوا عبر
الأناضول ودخلوا الشام؟
فكر كده لثواني.. كان فين؟
الحقيقة أن "أرطغرل" البطل الرهيب المغوار الجسور..
مع اقتراب قوات المغول.. خرج لهم شايل كفنه على إيده.. وقدم لهم مال وجواهر وأكثر
من خمسة آلاف مقاتل و700 امرأة هدية.
معلش راجع الجملة اللي فاتت مرة أخرى.. لو مخدتش بالك منها..
"أرطغرل" سلم النساء للمغول هدية.. عشان يحمي نفسه وكرسيه.
مفاجأة.. صح؟
مع التصرف دا طبعًا.. المغول رضوا عنه.. ومروا من أرضه.. اللي
سمحوا له يفضل أمير عليها.. بشرط دفع الجزية.. الحقيقة إن الأناضول وقتها كانت من
"الدول الدافعة للجزية".. اللي استسلمت للمغول.. مش بس كده.. جيش
الأناضول خدم تحت إمرة المغول.. وقاتلوا به.. وكان ضد الجيش المصري بقيادة
"الظاهر بيبرس" في معركة "الأبلستين".
شفت بقى أنهم بيضحكوا عليك.. بمسلسل عبيط.. يخليك لو قعدت مع أي
حد فاهم تاريخ.. أو شغل مخه لدقائق.. وكلمته عن "أرطغرل" العظيم
الشجاع.. حتبقى قدامه مش فاهم حاجة؟
شفت التاريخ بيتزيف إزاي في العقول والوجدان الجمعي للناس؟
النهاردة أنت بتفخر بالخاين اللي سلم حريمه للمغول وفتح لهم
الطريق وأمدهم بأموال وجنود.. وبتسخر من الجيش الي هزمهم.
أي مسخ حولوك إليه يا صديقي!
صدقت أنه بيتم العبث بعقلك؟
طالما صدقت.. وبدأت تشغل مخك.. فأنا بحييك.. والمرة دي أصطحبك
بقى نشوف تاريخ "أرطغرل" نفسه منذ الطفولة.. ومن بعده "عثمان الأول".
والقصص دي الحديث عنها يطول.. فنكمله سوا في وقت لاحق.
ويبقى للحديث.. بقية.
